नाशिक : बहुचर्चित अशी ठरलेली नाशिक पदवीधर मतदारसंघ निवडणुकीच्या मतमोजणीला सुरुवात झाली आहे. पहिल्या फेरीच्या सुरुवातीला सत्यजित तांबे आणि शुभांगी पाटील यांच्यात काटे की टक्कर दिसत असून एका फेरीच्या मोजणीला एक ते दीड तास लागणार आहे. त्यामुळे पुढील काही तासांत कोण आघाडीवर आणि कोण पिछाडी असणार आहे हे स्पष्ट होणार आहे. या निकालाकडे सर्व राज्याचे लक्ष लागले असून कोण विजयाचा गुलाल उडवणार हे पाहणे महत्वाचे ठरणार आहे. तसेच मतमोजणी केंद्रावर गोंधळ उडाल्याचे चित्र आहे. मतमोजणीच्या एका टेबलवर उमेदवार प्रतिनिधी जास्त असल्याने हा गोंधळ उडाला आहे. त्यामुळे निवडणूक अधिकाऱ्यांना पोलीसांना पाचारण करावे लागले आहे.
राज्यात आज शिक्षक-पदवीधर मतदारसंघाच्या निवडणुकांच्या मतमोजणीची जोरदार चर्चा सुरू आहे. आज सकाळपासूनच जिल्ह्यांमध्ये मतमोजणीला सुरुवात झाली. कोकणात भाजपाने विजयाचा नारळही फोडला असून ज्ञानेश्वर म्हात्रे विजयी झाले आहेत. मात्र त्यात सर्वात जास्त चुरसीची लढत नाशिक पदवीधरसाठी अपक्ष उमेदवार सत्यजित तांबे आणि मविआच्या उमेदवार शुभांगी पाटील यांच्यात लागली आहे.
अशी होतेय नाशिकची मतमोजणी
आतापर्यंत मतपत्रिकेंची छाननी केली असून आता मतमोजणीला सुरुवात झाली आहे. एका टेबल वर 1 हजार मत मोजली जाणार असून एकूण २८ टेबलवर मतमोजणी होणार आहे. एकाच वेळी २८ हजार मतांची मोजणी होणार असल्याची माहिती निवडणूक अधिकाऱ्यांनी दिली. एकूण ५ फेऱ्यामध्ये १ लाख ३० हजार मतांची मोजणी होणार आहे. एका फेरीच्या मोजणीला जवळपास एक ते दीड तास लागणार आहे. पुढील ५ ते ६ तास मतमोजणीची प्रक्रिया चालणार असून नाशिक पदवीधर कोण होतोय याचे निकाल स्पष्ट होतील.
मते बाद होण्याचं प्रमाण अधिक
या मतदारसंघात मतमोजणीत मते बाद होण्याचं प्रमाण अधिक असून आता उमेदवार धास्तावले आहेत. मते बाद झाल्यामुळे कोटा कमी होण्याची शक्यता वर्तवली जात आहे. एकूण मते १ लाख २९ हजार आहेत. त्यामुळे निम्मे मतांचा कोटा आवश्यक असून पूर्ण न झाल्यास मतमोजणीस अधिक वेळ लागणार आहे.