Video : तीन हजार पुस्तके वापरत साकारली बाबासाहेबांची प्रतिकृती

नाशिक | प्रतिनिधी

१४ एप्रिल अर्थात डॉ. बाबासाहेब आंबेडकर यांचा जन्मदिवस. पुस्तकांसाठी भव्य असं घर बांधणाऱ्या या महामानवाने अवघ आयुष्य पुस्तक लिहिण्यात अन वाचनात खर्ची केलं अन देशाला एक परिपूर्ण असं संविधान दिलं. ‘वाचाल तर वाचाल’ हा संदेश देत त्यांनी समाजाला वाचनाची प्रेरणा दिली. हाच धागा पकडत यंदाच्या जयंतीनिमित्त तब्बल तीन हजार पुस्तकांचा वापर करत साडेपाच हजार चौरस फुट शालेय मैदानात बाबासाहेबांची आकर्षक प्रतिकृती साकारत देव हिरे यांनी महामानवास अनोखं अभिवादन केलं आहे.

शिक्षण मंडळ भगूर संचलित नूतन माध्यमिक विद्यालय भाटगाव ता. चांदवड च्या प्रांगणात ही भव्य अशी कलाकृती साकारली असून त्यासाठी मुख्याध्यापक श्री.कृ.बा.लोखंडे, पर्यवेक्षक श्री.आ.वि. सोनवणे. यांच्या मार्गदर्शनातून हिरे यांनी ही कलाकृती दोन दिवसांत तब्बल बारा तास भर उन्हात उभं राहत आपली कलाकृती पूर्णत्वास नेली. यात तीन हजार पुस्तकांचा वापर झाला असून विद्यार्थ्यांनी मानवी साखळी करत ‘वाचाल तर वाचाल’ हा संदेश देखील दिला आहे.

https://youtu.be/89vie1TzhrY

याउपक्रमात चारशे विद्यार्थ्यांनी सहभाग नोंदवला असून हर्षद गवळी, हेमंत मोरे, योगराज खैरणार या विद्यार्थ्यांनी तसेच सहाय्य्क शिक्षक श्री. अनिल बहिरम यांनी देव हिरे यांना विशेष सहकार्य केले आहे.

कलाशिक्षक देव हिरे हे नेहमी आपल्या कलेच्या माध्यमातून महापुरुषांना अभिवादन करत असतात. मागील वर्षी त्यांनी बाजरीच्या भाकरीवर डॉ. बाबासाहेब आंबेडकर यांची चित्राकृती साकारली होती. त्यानंतर यंदा तीन हजार पुस्तकांच्या साहाय्याने भव्य प्रतिकृती साकारली आहे.