नाशिक : जिल्ह्यात अपघातांची मालिका सुरूच असून पुन्हा एक भीषण अपघात झाला आहे. सिन्नर शिर्डी महामार्गावर भरधाव वेगाने येणाऱ्या इनोव्हा कारने दुचाकीला जोरदार धडक दिली असून यात दुचाकीवरील माय-लेकाचा जागीच मृत्यू झाला आहे. अपघात सिन्नर शिर्डी महामार्गावरील फुलेनगर फाट्याजवळील पेट्रोल पंपावर जवळ झाला आहे. नाशकात सलग 4-5 अश्या मोठ्या अपघातांच्या या घटनेमुळे नाशिक हादरले असून ही एकच खळबळ उडाली आहे. भरधाव इनोव्हा कारने दुचाकीला जबर धडक दिल्याने दुचाकी वरील दोघेही गंभीर जखमी झाले आणि त्यांचा जागीच मृत्यू झाला, वैभव अशोक कुलकर्णी (३८) व सुवर्णा अशोक कुलकर्णी (७०) असे मृतांचे नाव आहे.
घटनेची अधिक माहिती अशी की, वैभव अशोक कुलकर्णी आणि सुवर्णा अशोक कुलकर्णी हे (दोघे रा. पंचवटी) फुलेनगर फाट्यावर असलेल्या पेट्रोल पंपावर दुचाकीमध्ये पेट्रोल भरून दोघे फुलेनगरकडे जाण्यासाठी शर्वरी लॉन्स समोरील रस्ता ओलांडत असतांना सिन्नरवरून शिर्डीच्या दिशेने भरधाव जाणाऱ्या इनोव्हा कारने त्यांना जोरदार धडक दिली.
यात ते दोघेही गंभीर जखमी झाले आणि त्यांचा जागीच दुर्दैवी मृत्यू झाला. दुचाकीचा पूर्ण तर इनोव्हा कारचा पुढून अक्षरशः चुराडा झाला आहे. अपघात अतिशय भीषण असून यात दोघांना आपला जीव गमवावा लागला आहे. वैभव अशोक कुलकर्णी आणि अशोक कुलकर्णी हे सध्या पंचवटीत वास्तव्यास असून त्यांचे मूळ गाव वावी असल्याची माहिती मिळाली आहे. या प्रकरणी पुढील तपास सहाय्यक पोलीस निरीक्षक सागर कोते यांच्या मार्गदर्शनाखाली पो.ह.दशरथ मोरे व नितीन जगताप करत आहे.