नाशिक : दिंडोरी रस्त्यावर सप्तशृंगी देवीच्या दर्शनाला जाणाऱ्या भाविकांची गाडी आगीत जळून खाक झाल्याची घटना घडली आहे. नाशिकहून वणी गडावर जात असताना वनारवाडी फाट्याजवळ कार मधून धूर येत असल्याने गाडी मालकाने गाडी रस्त्याच्या कडेला थांबवत गाडीचे बोनट उघडले असता त्यातून मोठ्या प्रमाणावर धूर येऊ लागला. त्यानंतर काही क्षणात गाडीने पेट घेतला. सुदैवाने गाडीत बसलेले सर्वजण बाहेर पडलेले असल्याने मोठा अनर्थ टळला. परिसरातील लोकांनी आग विझवण्याचा प्रयत्न केला मात्र तो अपयशी ठरला आणि गाडी पूर्णपणे जळून खाक झाली.
या घटनेत गाडीमध्ये असलेले सर्वजण वेळ असताच खाली उतरल्याने मोठी दुर्घटना टळली. मात्र गाडी पूर्णपणे भस्मसात झाली होती. काही क्षणात आगीने रौद्ररूप धारण केलं होतं.
नाशिक वणी रस्त्यावर सोमवारी (दिनांक २६) रोजी दुपारी दोन ते तीन वाजेच्या दरम्यान वणी येथील सप्तशृंगी देवीच्या दर्शनाला जात असताना भाविकाच्या कारने पेट घेतला होता. मालक गिरासे यांच्या मालकीची ही कार होती. महिंद्रा लोगन या कारने वनारवाडी फाट्यावर अचानक पेट घेतल्याने संपूर्ण कार काही क्षणांत जळून खाक झाली.
योगेश प्रकाश गिरासे यांची ही कार होती. ते आपल्या कुटुंबीयांसोबत नाशिकहून वणी येथे जात होते. दरम्यान वनारवाडी फाट्याच्या अलीकडेच त्यांच्या कारमधून अचानक धूर निघायला सुरुवात झाली. कारमधून धूर निघत असल्याचे त्यांच्या लक्षात आलं. त्यामुळे त्यांनी प्रसंगावधान राखत तात्काळ गाडी रस्त्याच्या कडेला घेतली आणि कारमधून ते चौघेही जण बाहेर पडले. त्यानंतर गाडीने पेट घेतला आणि काही क्षणांत आगीच्या मोठमोठ्या ज्वाळांनी गाडीला ताब्यात घेतलं.
स्थानिक नागरिकांच्या सहकार्याने आग विझवण्याचा प्रयत्न देखील करण्यात आला मात्र आगीने रौद्ररूप धारण केल्याने तो प्रयत्न यशस्वी ठरला आणि काही क्षणात कार पूर्णपणे जळून खाक झाली. या घटनेची माहिती मिळताच दिंडोरी पोलीस ठाण्याचे पोलीस घटनास्थळी दाखल झाले. त्यांनी देखील आग विझवण्याचा प्रयत्न केला. मात्र सुदैवानं कारमधील प्रवासी वेळेवर खाली उतरले असल्याने मोठा अनर्थ टळला आहे.