Home » येत्या सोमवारपासून नाशिक मनपाच्या १०० नव्या सिटी बस धावणार!

येत्या सोमवारपासून नाशिक मनपाच्या १०० नव्या सिटी बस धावणार!

by नाशिक तक
0 comment

नाशिक । प्रतिनिधी

नाशिक महापालिकेच्या (Nashik Municipal Corporation) ताफ्यात आता १०० नव्या सीएनजी सिटीलिंक बस (CityLink Bus) येणार आहेत. विशेष म्हणजे त्यासाठी आवश्यक असणारा पाथर्डी फाटा येथील सीएनजी गॅस प्रकल्पही सुरू झाला आहे. या निर्णयामुळे शहरातील सिटी बसची संख्या वाढणार असून सोबत इतक्या दिवस तोट्यात असणाऱ्या व्यवस्थापनाला आर्थिक बळही मिळणार आहे.

नाशिकमध्ये सिटीलिंक बससेवेची सुरुवात झाल्यानंतर पाच टप्प्यात २५० बस रस्त्यावर उतवण्याचे नियोजन आहे. सध्या सीएनजीवर चालणाऱ्या १०० आणि डिझेलवर चालणाऱ्या ५० बस आहेत. उर्वरित १०० बसला सीएनजी मिळत नसल्याने त्या बंद होत्या. मात्र, पाथर्डी येथील महाराष्ट्र नॅचरल गॅस कंपनीने ०२ मार्च रोजी प्रकल्पाचा नारळ फोडला. त्यामुळे महापालिकेचा बस सुरू करण्याचा मार्ग सुकर झाला.

दरम्यान पाथर्डी येथील गॅस प्रकल्प सुरु झाला असून रविवारी महापालिकेला १२०० किलो इतके सीएनजी मिळणार आहे. त्यानुसार येत्या सोमवारी १५ बस सुरू होणार आहेत. एप्रिलपर्यंत १२००० किलो सीएनजी मिळणार आहे. त्यामुळे महिनाभरात १०० सीएनजी बस रस्त्यावर धावणार आहेत. नाशिक महानगरपालिकेने सुरू केलेल्या सिटीलिंक बससेवेला चांगला प्रतिसाद मिळत आहे. मात्र, दिवसाकाठाचे उत्पन्न वाढूनही सेवा तोट्यात जात होती. आता सीएनजीवर सिटी बस धावल्या तर इंधन खर्चात बचत होणार आहे. त्यामुळे बस व्यवस्थापनाचा तोटाही कमी होणार आहे.

दिवाळीपासून राज्यभरात एसटी कर्मचाऱ्यांनी संप सुरू केला आहे. त्यामुळे खासगी वाहनातून प्रवास करताना अव्वाच्या सव्वा लूट सुरू आहे. हे पाहता सिन्नर, ओझर, त्रंबकेश्वर, भगूर, गिरणारे, सायखेडा, मखमलाबाद या ग्रामीण भागातून सिटीलिंक बसला चांगला प्रतिसाद मिळताना दिसत आहे. सातपूर तसेच इतर परिसरात कामगारांचा रोज राबता असतो. त्यांना त्यांच्या इच्छित स्थळी पोहचवण्यासाठी सिटीलिंक बससेवेने उत्तम जबाबदारी पार पाडली आहे.

You may also like

Leave a Comment

सर्वात आधी ब्रेकिंग न्यूज साठी Join करा आमचा ग्रुप

error: Content is protected !!