नाशिक : जिल्ह्यात पुन्हा एकदा बर्निंग ट्रकचा थरार पाहायला मिळाला आहे. सिन्नर-घोटी मार्गावर घोरवड घाटात आज सकाळी सात वाजेच्या सुमारास धावत्या ट्रकला अचानक आग लागल्याची घटना घडली आहे. या आगीत ट्रक पूर्णपणे जळून खाक झाला असून या ट्रक मध्ये प्लास्टिक भरलेले असल्याचे समजत आहे.
ट्रक मध्ये प्लास्टिक असल्यामुळे आगीने काही क्षणातच रौद्र रूप धारण केले होते. आगीचे लोळच्या लोळ हवेत उठत होते. त्यानंतर घटनास्थळावर सिन्नर नगरपरिषदेच्या अग्निशमन विभागाला पाचरण करण्यात आले. पथकाने शर्तीचे प्रयत्न करीत आग आटोक्यात आणली.
मिळालेल्या अधिक माहिती नुसार हा ट्रक (क्र.- एमएच ४८बीएम १६७६) घोटीहून सिन्नरच्या दिशेने जात होता. दरम्यान या धावत्या ट्रकला सिन्नर-घोटी मार्गावर घोरवड घाटात अचानक आग लागली. पाहता पाहता आगीने रौद्ररूप धारण केले. ट्रक मध्ये प्लास्टिक असल्याने आगीचा भडका उठला. काही क्षणांत ट्रक पूर्णपणे आगीच्या आहारी गेला होता. त्यानंतर या आगीत ट्रक पूर्णपणे जळून खाक झाला.
एमआयडीसी अग्निशमन दलाचे कर्मचारी घटनास्थळी दाखल झाले. लाला वाल्मिकी, नवनाथ जोंधळे, आकाश देवकर, लक्ष्मण सोनकुसरे, जयेश बोरसे आदींच्या पथकाने ही आग आटोक्यात आणण्यासाठी प्रयत्न केले. त्यानंतर अखेर आग आटोक्यात आली. मात्र ट्रकची राख झाली होती.
सध्या वाहन अचानकपणे पेट घेत असल्याच्या घटना सातत्याने घडताना दिसत आहेत. कालच मुंबईतील परळ पुलावर ट्रकला भीषण आग लागल्याची घटना घडली होती. या घटनेत वेळीच ट्रकमधून बाहेर उडी मारल्याने चालकाचे प्राण बचावले. मात्र ट्रक जळून खाक झाली. नाशिकमध्ये देखील या आधी बऱ्याचदा बर्निंग ट्रकचा थरार पाहायला मिळाला आहे. सातत्याने घडणाऱ्या या आग लागण्याच्या घटनांमुळे वाहन चालक आणि प्रवाशांच्या जीवाला कुठेतरी धोका निर्माण होत आहे.
थोडक्यात बातमी :
सिन्नर-घोटी मार्गावर बर्निंग ट्रकचा थरार
घोरवड घाटात आज सकाळी सात वाजेच्या सुमारास धावत्या ट्रकला अचानक लागली आग
आगीत ट्रक जळून खाक
या ट्रक मध्ये प्लास्टिक भरलेले असल्यामुळे आगीने काही क्षणातच धारण केले होते रौद्र रूप
घोटीहून सिन्नरच्या दिशेने जात होता हा ट्रक
सिन्नर नगरपरिषदेच्या अग्निशमन दलाने आग आणली आटोक्यात